Germaniyä Rusiyädän qaçuçılarnı sıyındıra

Germaniyä êçke êşlär ministrı Nênsi Fayzer öleşçä mobilizaśiyä iğ’lan itkän Rusiyädä ğaskärgä kitüdän baş tartuçılarnıñ üzlärenä sıyınu öçen möräcäğat’ itä aluın belderde.

Räsmi zat “Frankfurter Allgemeine Sonntagszeitung” gazetına interv’yusında bolay di: “Qağıydä bularaq, awır basım yanawı astındağı qaçqın ğaskärilär Germaniyädä xalıqara yaqlawdan faydalana ala. Vladimir Putinnıñ rejimına qıyu räweştä qarşı çıqqan häm şunıñ arqasında üzlären zur qurqınıç astına quyğan härkem säyäsi êzärlekläw säbäple Germaniyädän sıyınu sorıy ala”.

Nênsi Fayzer Germaniyäneñ bolay da inde niçä ay êzärleklängän häm yanawlarğa duçar bulğan Rusiyä oppoziśionerların qabul itüen dä äytä.

Germaniyä yustiśiyä ministrı Marko Buşmann da: “Putinğa näfrät xis itüçe häm liberal’ demokratiyä yaratuçı härkem Germaniyädä bezgä quşıla ala” - dide.

Şul uq waqıtta, Baltıyq däwlätläre Rusiyä liderı Vladimir Putin iğ’lan itkän öleşçä mobilizaśiyä säbäple ilennän qaçuçılarğa sıyınu xoquqı birmäyäçäklären citkerde.

Latviya tışqı êşlär ministrı Êdgars Rinkeviçs Rusiyä watandaşlarına iminlek säbäbe belän viza birmäyäçäklären xäbär itte. Ul monı Putinnıñ şantajına qarşı toru hän Ukrainanı yaqlawların däwam itä alu öçen êşläwlären äytä.

Litva saqlanu ministrı Arvidas Anusauskas ta ğaskärgä alınu qararınıñ sıyınu xoquqı öçen citärlek säbäp bulmawın, tik dinnäre säbäple êzärleklänügä duçar buluçılar öçen işeklären açaçaqların belderde.

Êstoniya êçke êşlär ministrı Layri Laanemets isä Rusiyäneñ Ukrainanı basıp aluında barlıq rusiyälelärneñ dä ğayebe barlığın uylawın äytä häm ruslarnı üz illärenä alularınıñ Awrupa Berlege sankśiyälären bozacağın belderä.