İranda çualışlar

İranda 22 yäşendä ülgän Mäxsa Äminineñ “başqa yabınu qağıydälären ütämäwe” öçen qulğa alınğannan soñ wafat buluı arqasında başlanğan demonstraśiyälär däwam itä. Kirmanşah töbägendäge çualışlarda 2 keşeneñ ğomere özelde, 25 keşe yaralandı.

İran däwlät telekanalınıñ xäbärenä qarağanda, Kirmanşah prokurorı Şähram Kärämi kiçä kiçke säğat’lärdä töbäktä bulğan rizasızlıq çaralarında däwlät milkenä zarar kiterelüen belderde.  Ul älege waqıyğalarda 2 keşeneñ hälaq buluın da äytte. “Tikşerü monıñ hiçşiksez fetnäçelär tarafınnan yasaluın kürsätä, çönki iminlek häm xärbi köçlärneñ inventarenda bulmağan qoral belän üterelgännär,”-di prokuror.

Başqala Tähranda isä Xafiz küpere häm Väliasr uramı tiräsendä kiçä tönge säğat’lärgä qadär däwam itkän rizasızlıq çaraları töş turısında qabat başlandı. Anda qatnaşuçılar Tähran idaräsenä qarşı şiğar’lär qıçqıra. İminlek köçläre alarğa qarşılıq kürsätä.

Mediada, şähär üzägennän tış, Tähran häm Äl Zahra universitetlarında da protest çaralarınıñ başlanuı turında xäbärlär çığa.

Tähran gubernatorı Muxsin Mänsuri Twitterdağı yazmasında bolay di: “Tährandağı waqıyğalarda qayber ilçeleklär häm çit küzläw xezmätläreneñ êzläre açıq kürenä. Tähranda 3 çit il watandaşı qulğa alındı”.

Şul uq waqıtta, İran tışqı êşlär ministrlığı AQŞ, Awrupa Berlege häm qayber başqa illärdän kilgän belderülärne “İrannıñ êçke êşlärenä tıqşınu” bularaq bäyäläde. Ministrlıq wäkile Nasır Kenani bu illärne opportunizmda ğayepläde.

Tähranda 13nçe sentyabr’dä “äxlaq poliśiyäse” bularaq bilgele İrşad patrule tarafınnan qulğan alınğannan soñ komağa kerep xastaxanägä salınğan Mäxsa Äminineñ 16nçı sentyabr’dä ğomere özelüe ildä fetnä kiterep çığardı.

Kördestan töbäge gubernatorı İsmail Zareykuşa kiçä cirlektäge çaralarda 3 keşeneñ ğomere özelüen, tik alarnı iminlek köçläre tügel, provokatorlar üterüen äytkän ide.