Êlizabet İkençeneñ räsmi cenaza köne bilgele
Cenaza çarası patşabikä kiyäwgä çıqqan çirkäwdä uza
Angliyä patşabikäse Êlizabet İkençeneñ räsmi cenaza cıyını 19nçı sentyabr’, düşämbe könne ütäçäk. Bukingêm Sarayınnan yasalğan belderüdä märasimneñ başqala Londondağı Vestminster Abbey çirkäwendä oyıştırılaçağı äytelä. Älege ğıybadätxanädä tarix buyınça patşalar häm patşabikälärneñ tac kiyü tantanaları uza. Patşabikä Êlizabet İkençe belän prinś Filipp 1947nçe yılda şunda öyläneşkän.
Cenaza çarasına dön’yanıñ här poçmağınnan däwlät başlıqları kiläçäk. Anda yaqınça 2 meñ keşelek yuğarı däräcäle zatlarnıñ qatnaşuı kötelä.
Kiçä räsmi räweştä Angliyäneñ yaña patşası iğ’lan itelgän Çarl’z Öçençe cenaza könne ildä räsmi yal bulaçağın belderde. Ul il külämendäge matämneñ soñğı köne dä bulaçaq.
Prinś Uil’yam media platformasında urtaqlaşqan yazmasında dön’yanıñ - ber lidernı, üzeneñ isä däw änisen yuğaltuın belderde. “Bu könneñ kiläçägen belä idem. Tik däw änisez tormışnıñ çınbarlığın qabul itü öçen bezgä waqıt kiräk. Patşa bulğan ätiyemä här yaqtan yardam kürsätep patşabikä Êlizabet İkençeneñ istälegenä xörmät kürsätäçäkmen” dip yazdı ul.
