Vulkan kükkä 58 meñ olimpiyä basseynı qadär su attı

Tın okeandağı utraw-däwlät Tongoda ğıynvar ayında bulğan yanartaw şartlawı atmosferağa 58 meñ olimpiyä basseynın tutıra alırlıq su parı atıluına säbäpçe buldı.

AQŞnıñ aviaśiya häm ğaläm agentlığınıñ Aura iyärçenendäge mikrodulqınlı Limb Siren cihazı açıqlağança, älege parlar Cir öslegennän 12 belän 53 çaqrım aralıqtağı stratosferağa urnaşa.

NASA su parları külämeneñ küplege säbäbeneñ şartlawnıñ okean öslegennän 150 metr tiränlektä buluı belän bäyle ikänen belderde. Alar xäzer stratosferada bulğan sunıñ 10%ın täşkil itä. Älege parlar cılılıqnı totıp tora, şuña kürä Cir öslegeneñ waqıtlıça cılınuı mömkin.

Tikşerenüçelär ğadättägedän artıq su parlarınıñ stratosferada berniçä yıl qala aluın äytä. Tik alarnıñ cılıtu täêsire az bulaçaq häm xäzerge klimat şartların tağın da naçaraytuı kötelmi.

Tın okeanda yaqınça 170 utrawdan toruçı Tongonıñ Xunga-Xaapay utrawındağı yanartaw 15nçe ğıynvarda uyandı häm köl, par, gaz ata başladı.

Şartlawdan soñ Tongo, Yaña Zelandiyä, AQŞ, Kanada, Çili häm Yaponiyä öçen śunami kisätüe yasaldı. Ul Tongodağı barlıq utrawlarğa diyärlek bärde.