Trampnıñ öyendä tentü

Trampnıñ Aq Yorttan yäşeren dokumentlarnı urlawı söylänä

1865350
Trampnıñ öyendä tentü

AQŞnıñ êlekkege ilbaşı Donal’d Tramp Federal’ tikşerü byurosınıñ (FBİ) Floridadağı öyenä basqın yasawın belderde. Ul sośial’ mediada yazğança, FBİ agentları düşämbe kiçke säğat’lärdä Mar-a-Lagodağı milegenä bärep kergän häm seyfın açqan.

“Floridanıñ Palm-Biçendäge öyem Mar-a-Lago xäzerge waqıtta qamap alındı, FBİ agentlarınnan toruçı zur törkeme basqın yasadı häm anı basıp aldı. Bu xalqıbız öçen qarañğı çor. Älegä qadär ber genä AQŞ ilbaşı belän dä mondıy xäl bulmağan” dip yaza Tramp.

AQŞ dairälärennän alınğan mäğ’lümatlarğa qarağanda, Tramp Aq Yorttağı qayber yäşeren dokumentlarnı qanunsız räweştä Mar-a-Lagoğa alıp kitkän digän süzlär bar. FBİ älege oçraqnı tikşerü qısalarında tentü ämere çığarğan.

“N’yu-York Tayms”  bu xaqta tikşerüdä qatnaşuçı ike şäxesneñ süzlärenä tayanıp yaza.

AQŞ yustiśiyä ministrlığı häm FBİ älegä bernindi belderü dä yasamadı.



Bäyläneşle xäbärlär