Awrupa êsselektän qırıla

Awrupa illärendä ülüçelär sanı kisken arttı

1864004
Awrupa êsselektän qırıla

Awrupada qayber illärdä termometrlar +45 gradusnı kürsätä torğan çiktän tış êsselek arqasında uzğan ayda meñnärçä keşeneñ ğomere özelde.

“Politico Europe” internet säxifäsendäge xäbärgä qarağanda, Awrupa qıytğasında uzğan ay temperatura zur külämdä arttı, bigräk tä, 18nçe-20nçe iyül’dä ul iñ yuğarı noqtasına mende.

Angliyä häm Germaniyädä iyül’dä cılılıq +40 gradusqa citte. Ber ük waqıtta qorılıq, urman yanğınnarı häm hawa pıçranu da arttı.

Awrupanıñ bik küp däwlätendä kürsätkeçlär iyül’ ayı urtasında ülüçelärneñ kübäyüen dälilli. Belgeçlär monıñ êsselek belän bäyle buluın alğa sörä.

Germaniäyädä älege atnada, berençel mäğ’lümatlarğa qarağanda, koronavirusqa bäyle bulğannar tışında, soñğı 5 yılda terkälgännän 3 meñgä kübräk ülem kürelä. Angliyädä şul uq çorda 1180 keşeneñ ğomere özelä.

+45 gradus cılılıq kürelgän İspaniyä häm Portugaliyädä dä iyül’ urtasında ülemnär, aldağı yıllar belän çağıştırğanda, iñ yuğarı däräcägä citte. İspaniyädä soñğı 5 yıldağı urtaça kürsätkeçlärdän 2700gä artığraq keşe wafat buldı. Çiktän tış êsselek bärgän Niderlandta isä bu san 559ğa artıq ide.

Yuğarı hawa temperaturası häm susızlıq sulış yulları qıyınlıqları, yöräk awıruları häm Al’śgeymer xastalığı bulğan keşelär öçen risk faktorı.

Belgeçlär çiktän tış êsse hawa dulqınınıñ klimat üzgärü näticäse buluın belderä.



Bäyläneşle xäbärlär