Ugandada açlıqtan ülälär

Ugandanıñ tön’yağındağı Karamoja töbägendä 900dän artıq keşeneñ qorılıq arqasında açlıqtan ülüe däğwa itelde.

“Daily Monitor” gazetı beldergänçä töbäk räsmi zatları fevral’ ayınnan bügengä qadär açlıq häm açlıqqa bäyle xastalıqlar arqasında Kaabongta 259, Napakta 49, Kotidoda 626 keşeneñ can birüen belderde. Ğomere özelüçelärneñ kübese balalar häm olı yäş’tägelärdän tora.

İgençelek häm terlekçelek betä barğan töbäkkä uzğan atnada cibärelgän azıq-tölek yärdämnäre isä citärsez buldı.

Cirle citäkçelär xökümätne töbäkkä yärdäm kürsätüne arttırırğa çaqırdı.

BMOğa kürä töbäktäge här 10 keşedän 8e azıq-tölek qurqınıçsızlığı êçendä häm açlıq belän köräşä.