Putin Tatarstan ilbaşınıñ prezident titulın ğamäldän çığardı

Rusiya Federaśiyäse däwlät başlığı Vladimir Putin räsmi dokumentta berençe tapqır Tatarstan ilbaşı Röstäm Miñnexanovnıñ “ilbaşı (prezident)” titulın ğamäldän çığardı.

Putin Rusiya Federaśiyäse Däwlät şurası äğ’zaları turında imzalağan qararnamädä Röstäm Miñnexanovnıñ sıyfatın federaśiyäne tözüçe töbäklärneñ iñ yuğarı däräcäle citäkçesenä birelgän “başlıq” titulına üzgärtte.

Vladimir Putin uzğan ayda ütkän Däwlät şurası utırışında Miñnexanovnı “ilbaşı ( prezident)” dip atağan ide.

Rusiya parlamentınıñ tübän palatası Däwlät Dumasında qayber xalıq ışanıçlıları sentyabr’ ayında Rusiyä Federaśiyäsen täşkil itüçe töbäklärneñ iñ yuğarı däräcäle citäkçeseneñ sıyfatınıñ qullanıluına qağılışlı federal’ külämdä qanun ölgesen äzerläde.

Ölge Tatarstan Cömhüriyäte Däwlät Şurasına cibärelde.

Tatarstan parlamentı 25nçe oktyabr’dä ütkärelgän utırışta 100 xalıq ışanıçlısınnan 82seneñ tawışı belän älege qanunnı kire qaqtı.

Moña qaramastan zakon proyektı Däwlät Dumasında 14nçe dekabr’dä qabul itelde.

 Federaśiya Şurasında da 15nçe dekabr’dä raslanğan qanunğa 21nçe dekabr’ könne Rusiya däwlät başlığı Vladimir Putin qul quydı.

Qanun nigezendä  federaśiyäne täşkil itüçe töbäklärneñ iñ yuğarı däräcäle citäkçese "töbäk (region) başlığı" dip atala.

Qanundağı töbäk başlığınıñ sıyfatı häm wäqalätläre belän bäyle öleşe 2022nçe yılnıñ iyün’ ayında ğamälgä kerde.