İlon Mask Twitterdan baş tarta

İlon Mask sośial’ media şirkäte Twitternı yaqınça 44 milliard dollarğa satıp alu kileşüen ğamäldän çığara.  AQŞnıñ qıymmätle qäğaz’lär häm birja komissiyäsennän belderülärençä, milliarder kileşüneñ berdän artıq nigezlämäseneñ bozıluın säbäp itep kürsätä. Ul oyışmağa kileşüdän baş tartuın belderep räsmi xat cibärgän.

İlon Mask başta Twitternıñ 9,2% akśiyälären satıp alğan ide. 14nçe aprel’dä ul şirkätkä här akśiyä öçen 54,2 dollar täq’dim itte. Twitter 25nçe aprel’dä yasağan belderüendä sośial’ media platformasınıñ Maskka satıluı turında kileşü täêmin itelüen citkerde. Ä inde 13nçe mayda milliarder älege kileşüneñ waqıtlıça tuqtatıp torıluın xäbär itte. Säbäp itep ul Twitterda spam häm yalğan akkuntlarnıñ tulayım qullanuçılarnıñ 5%ınnan kimrägen täşkil itüe turındağı xisaplawlar belän bäyle centekle añlatu kötüen kürsätte.

Masknıñ satıp alu kileşüen ğamäldän çığaruınnan soñ Twitter tarafınnan berençe reakśiyä yasaldı. Şirkätneñ idarä şurası räise Taylor anı mäxkämägä biräçäklären häm anda ciñäçäklärenä şöbhälänmäwen äytte.

İlon Masknıñ advokatları AQŞnıñ qıymmätle qäğaz’lär häm birja komissiyäsenä cibärgän belderüdä Twitternıñ platformadağı yalğan yäisä spam akkauntları belän bäyle mäğ’lümat birü taläbenä cawap birmäwen assızıqlıy. Anda, şulay uq, şirkätneñ kileşüdäge bik küp nigezlämälärne töptän bozuı, yalğış häm butalçıq bäyannar birüe äytelä.     

Satıp alunı tuqtatu qararınnan soñ kileşüneñ şartı kön tärtibenä çıqtı: êşçänlek tögällänmägän oçraqta Mask 1 milliard dollar tülärgä tiyeş.