Yaponiyäneñ êlekkege xökümät räisen attılar

Yaponiyäneñ êlekkege xökümät räise Abe Şinzoğa Nara şähärendä utlı qoraldan attılar.

Yaponiyä däwlät telekanalı NHKnıñ xäbärenä qarağanda, Abe Liberal-demokratik partiyä namzäteneñ saylaw kampaniyäsenä yärdäm itü öçen açıq hawada uzuçı çarada çığış yasıy. Şul waqıtta anıñ kükrägenä atalar. Qan êçendä qalğan säyäsätçene aşığıç räweştä xastaxanägä iltälär. Awır yaralanğan Abenıñ xäle citdi buluın belderälär.

Höcümçe waqıyğa urınınnan yıraq kitä almıy, anı qullanğan mıltığı belän bergä êläkterälär. Ul êlek xärbi diñgez flotında xezmät itkän 41 yäş’lek Yamagami Tetsuya bulıp çığa.

Abe Şinzo 2012-2020nçe yıllar çorında xökümät räise wazıyfasında ide. Ul ilneñ iñ ozaq waqıt xakimiyättä qalğan prem’yer-ministrı buldı. Abe 2 yıl êlek sälamätlege naçarayu arqasında wazıyfasınnan kitte.