"Rusiyä dön’yanıñ iñ zur terror oyışmasına äylände"

Bu xaqta Ukraina däwlät başlığı Vladimir Zelenskiy Telegramda citkerde

1848927
"Rusiyä dön’yanıñ iñ zur terror oyışmasına äylände"

Ukraina däwlät başlığı Vladimir Zelenskiy rus köçläreneñ Kremençugta meñnän artıq watandaş bulğan säwdä üzägenä ut açuın citkerde.

Höcümdä 16 keşe ülde, 59 keşe yaralandı.

Zelenskiy Telegramda açıqlaw yasap: “Yawlawçılar Poltava töbägendäge Kremençug şähärendäge ber säwdä üzägenä raketalar ırğıttı. Bu terrordan başqa närsä tügel. Cir yözendä bulmasqa tiyeş terrorçılar ğına mondıy urınnarğa raketalı höcümnär oyıştıra ala. Bu yalğış qına başqarılğan höcüm tügel. Rusiyä dön’yanıñ iñ zur terror oyışmasına äylände. Bu – çınbarlıq. Dön’yadağı härkem Rusiyä belän êş başqarunıñ terrorçılarğa aqça birü buluın añlarğa tiyeş. Dön’ya rus terrorın tuqtata ala häm tuqtatırğa tiyeş tä,” – dide.

Ukraina hawa köçlärennän yasalğan açıqlawğa kürä Amstor säwdä üzägenä Rusiyäneñ Kursk töbägennän “Tu-22M3” törendäge xärbi oçqıçlar “X-22” raketaların oçırttı.

Vladimir Zelenskiy Rusiyäneñ Ukraina cirlärenä yaqınça 2800 raketa ırğıtuın citkerde.

Xar’kovka da rus köçläre tarafınnan oyıştırılğan hawadan höcümdä 5 keşe ülde, 30dan artıq keşe yaralandı. Yaralanuçılar arasında balalar da bar.



Bäyläneşle xäbärlär