Törkiyä häm Rusiyä xärbi wäkillekläre Mäskäwdä oçraştı

Azıq-tölek krizisınıñ çişeleşe häm Ukraina portlarında kötkän aşlıq töyälgän köymälärneñ êvakuaśiyäsı belän bäyle bularaq Törkiyä häm Rusiyä xärbi wäkillekläre arasındağı cıyılış sişämbe könne Rusiyä başqalası Mäskäwdä ütkärelde.

Cıyılışta "Problemanıñ çişeleşenä qağılışlı bularaq Törkiyä, Rusiyä, Ukraina häm Berläşkän Millätlär Oyışması wäkillekläreneñ söyläşüe añlayışı"nıñ xasil buluı citkerelde.

Törkiyäneñ Rusiyä-Ukraina suğışı arqasındağı “azıq-tölek krizisınıñ” çişeleşe öçen başlatqan diplomatik kereşüläre belän Milli saqlanu ministrı Hulusi Akarnıñ Rusiyä häm Ukraina wazıyfadaşları belän ütkärgän söyläşülärennän soñ Törkiyä belän Ukraina häm Rusiyä arasında alıp barılğan “qızıl liniya diplomatiyası” uñay näticälär birä başladı.

Bu qısada azıq-tölek krizisınıñ xäl itelüe, Ukraina portlarında kötkän aşlıq töyälgän säwdä köymäläreneñ êvakuaśiyäse, Törek qorallı köçläreneñ Borispol hawa mäydanında qalğan oçqıçlarınıñ Törkiyägä imin räweştä qaytuı kebek mäs’älälärne tikşerü öçen Törkiyä Milli saqlanu ministrlığınnan xärbi wäkillek sişämbe könne Rusiyägä kitte.

"Qızıl liniya diplomatiyası" qısalarında wazıyfalandırılğan törek häm urıs generalları räislegendäge xärbi wäkilleklärneñ başqala Mäskäwdäge söyläşüläreneñ “konstruktiv häm şaqtıy uñay atmosferada uzuı” xäbär itelde.

Aşlıq töyälgän säwdä köymäläreneñ Ukraina portlarınnan êvakuaśiyası quzğatılğan cıyılışta problemanıñ çişeleşe belän bäyle bularaq Törkiyä, Rusiyä, Ukraina häm BMO arasında söyläşülärneñ ütkärelüenä qağılışlı añlayışnıñ barlıqqa kilüe belderelde.

Bu qısada Ukraina häm BMO tarafı belän söyläşülärdän soñ kiläse atnalarda Törkiyädä dürt yaqlı bularaq oçraşu ütkärelüeneñ kötelüe citkerelde.

Şul uq waqıtta Mäskäwdäge söyläşü berence anıq näticäsen dä birde. Ozaq däwam itkän cıyılış betkäç berniçä säğättän soñ könnär buyı kötkän Törkiyä qorı yök köymäse Ukraina portınnan çığıp kitte.

"Azov Concord" isemle törek qorabı Ukrainanıñ Rusiyä armiyası häm separatistlarnıñ kontrolendäge Mariupol portınnan kitkän berence çit il köymäse buldı.