Kön'yaq Koreya "Nuri"nı qabat oçırttı

Kön’yaq Koreya üze çığarğan raketa “Nuri”nı ikençe tapqır ğalämğä oçırdı. Ul 2021nçe yılda üzenä berketelgän 1 yarım tonna awırlığındağı yasalma iyärçenne orbitağa urnaştıra almağan ide.

Raketanı Koxın şähärendäge Naro ğaläm üzägennän qabat oçırttılar. Anıñ iyärçennärne Cirneñ 700 çaqrım östendäge orbitağa urnaştıruı planlaştırıla. Ägär bu uñışlı kilep çıqsa, Kön’yaq Koreya üz texnologiyäläre belän ğalämgä iyärçen cibärgän 7nçe däwlät bulaçaq. Näticäneñ bügen kiçke säğat’lärdä bilgele bulacağı belderelde.

İkençe oçırtu naçar hawa şartları säbäple başta 16nçı iyün’gä, soñınnan raketanıñ tank sektorında xilaflıq çığuı säbäple bilgesez waqıtqa kiçekterelde.

Nuri täwge tapqır 2021nçe yılnıñ 21nçe oktyabrendä başqala Seuldan yaqınça 500 çaqrım yıraqlıqtağı ğaläm üzägennän oçırtılğan ide. Kön’yaq Koreya ilbaşı Mun Çje İn raketanıñ tiz räweştä yul aluın, tik tonna yarım awırlıqtağı iyärçenne orbitağa urnaştıra almawın belderde.  

Koreya ğaläm tikşerenüläre institutı Nuri raketasınıñ 2027nçe yılğa qadär tağın 4 tapqır oçırtıla aluın xäbär itte. Anıñ 1 milliard 600 million dollarğa töşüe farazlana.

200 tonna awırlıqta häm 47,2 metr ozınlıqtağı raketada 6 motor bar.