Germaniyä Ukrainağa hawa saqlanu sisteması birä

"Putin maqsatlarına ireşmäskä tiyeş” -di Germaniyä kanślerı Olaf Şol’ś

1836108
Germaniyä Ukrainağa hawa saqlanu sisteması birä

Germaniyä kanślerı Olaf Şol’ś Rusiyägä qarşı suğışuçı Ukrainağa “İris-T” törendäge hawa saqlanu sistemaları bireläçägen belderde. Ul Federal’ parlamentta baruçı byudjet utruşları qısasında ğomum şurada çığış yasadı.  

Şol’ś Germaniyäneñ böten mömkinlekläre belän Ukrainağa yärdäm itäçägen äytep bolay dide: “Putin maqsatlarına ireşmäskä tiyeş”.

Kanśler ileneñ Ukrainağa finans häm iq’tisadi yaqtan da teräk buluın, qoral da birüen assızıqladı. Xökümät xäzer üzendäge iñ zamança hawa saqlanu sisteması “İris-T”nı Ukrainağa cibärergä qarar birde. “Şulay itep, Ukraina rus höcümnärenä qarşı zur ber şähärne saqlıy alaçaq,”-dide Şol’ś. Ul, monnan tış, Ukrainağa radar sisteması da bireläçägen citkerde. Niderland belän bergä isä iñ zamança gaubiśalar belän täêmin itäçäklär.

Şol’ś Germaniyäneñ Ukrainağa qoral häm suğış kiräk-yaraqları birmäwe turındağı tänqıyt’läwlärgä qarşı çıqtı. Ul suğış başlanğannan soñ ul çorda Ukrainanıñ aşığıç ixtiyacı bulğan hawa höcüme häm tankka qarşı raketalar cibärülären, soñınnan 15 million yädrä, 100 meñ granata, 5 meñnän artıq tank minası, komplekslı şartlatqıç, avtomat mıltıqlar belän täêmin itülären belderde.  

Olaf Şol’ś Ukraina xökümäteneñ “Gepard” tankların alu öçen Germaniyä saqlanu sänäğate belän kileşü imzalawın xäterlätte. Ul Putinnıñ bu suğışta ciñmäskä tiyeşlegen qabatlap bolay di: “Suğışnıñ maqsatları turında bäxäslär bara. Bezneñ maqsat - Putinnıñ ciñmäwe. Bezneñ maqsatıbız Ukrainanıñ üzen saqlıy aluı häm şulay itep unışqa ireşüe”.

Germaniyä kanślerı Ukraina belän bäyle qararlarnı ukrainalılar çığaraçağın assızıqladı.



Bäyläneşle xäbärlär