Braziliyädä tabiğıy afättä 100 keşe ülde
Köçle su basu häm cir ubılularda yuğalğan keşelärne êzläw däwam itä
Braziliyäneñ Pernambuku töbägeneñ törle rayonnarında 25nçe maydan birle baruçı köçle yañğırlar kiterep çığarğan su basu häm cir ubılularda ğomere özelüçelär sanı 100gä citte. Yuğaluı belderelgän 16 keşene êzläw-qotqaru êşläre däwam itä. Anda 436 professional qatnaşa.
Afät säbäple yaqınça 6 meñ 200 keşe yäşägän cirlären taşlap kitärgä mäcbür buldı. Pernambuku töbägendä ğadättän tış xäl iğ’lan itkän şähärlär sanı 24kä citte.
Braziliyä regional’ üseş ministrı Daniêl Ferreyra xökümätneñ ğadättän tış xäl iğ’lan itkän muniśipalitetlarğa aqça bülep birü öçen tırışuın belderde. Ul, monnan tış, afättän zarar kürgän şähärlär öçen yaña kredit limitı buldırıluın da äytte.
Braziliyä däwlät başlığı Jair Bolsonaru hälakättän iñ zur zarar kürgän töbäk Pernambukunıñ başqalası Resifi häm Jaboataw-dus-Guararapis şähärenä bardı. Ul cirlekne küzdän kiçergännän soñ belderülär yasadı. Bolsonaru cirneñ yüeş buluı säbäple boralaqnıñ töşep utıra almawın äytte.
“Qızğanıçqa, bu afätlär qıytğa zurlığındağı däwlättä bula. Çınlap ta bik qızğanıç. Ğailälärneñ qayğısın urtaqlaşam. İñ zur maqsatıbız ğailälärne borçuların azaytu häm matdi yaqtan öleş kertü,”-dip söyläde Jair Bolsonaru.
