Şaxtyerlar üzara suğışa

Çadnıñ tön’yağında Liviyä çiklärenä yaqın altın şaxtalarında êşläwçelär arasında uzğan atnada başlanğan bäreleşlärdä 100dän artıq keşeneñ ğomere özelde. Yaralanuçılarnıñ da distälärçä buluı belderelä.

Cirle matbuğattağı xäbärlärgä qarağanda, Tibesti töbägendäge Kuri-Bugudi rayonında şaxtada 23nçe mayda tama häm ğaräp qabiläläre arasında êtnik bäreleş kilep çığa. Töbäkkä saqlanu ministrı Davud Yaya İbrahim da bardı. Cirlektä xökümät barlıq qanunsız şaxtalarnıñ êşçänlegen tuqtattı. Ülüçelärne kümü häm yaralılarnı êvakuaśiyäläw bara.

Qayber başqa çığanaqlar ülüçelärneñ sanınıñ 200dän artuın häm yaralılarnıñ yözlärçä buluın citkerä.