Parij yolım aqçasına tözelgänme?

Amerikanıñ “N’yu-York Tayms” gazetı Franśiyäneñ, Êyfel manarasın da kertep, başqala Parijdağı küp qorılmalarnı Gaitidan cıyğan salım aqçalarına tözüen alğa sörä.

Gazetnıñ “Ranson” (Yolım) dip ataluçı külämle xäbärendä Êyfel manarasınıñ tözeleşen finanslağan Franśiyä bankı “Crédit Industriel et Commercial”nıñ Gaitidan “bäysezlek bäyäse” bularaq aqça aluın citkerä.

Xäbärdä Gaitinın 64 yıl buyı Franśiyägä tülägän aqçalarınıñ bügen yaqınça 560 million dollar külämendä buluı äytelä.

19nçı ğasır axırı-20nçe ğasır başlarında “Crédit Industriel et Commercial”nıñ Gaiti qaznasınnan Franśiyägä millionlağan dollar küçerüe alğa sörelde. Banknıñ älege koloniyä çorına qarawçı arxivlarınıñ tulısınça diyärlek yuq itelüe äytelä. Bäxäslärgä säbäpçe bulğan bank bu mäs’äläne tikşerä başlayaçağın belderde.

Xäbär ingliz, franśuz häm gaiti telendä basılıp çıqtı.

Tanılğan Gaiti jurnalistı Nênsi Rok xäbärneñ üzläreneñ telendä dä basıluın assızıqlap: “Bügen Gaiti öçen êşli alırday iñ zur xezmätegez - bu tikşerenü xäbären uqu,”-dide.

Xäbärdä citkerelgänçä, dön’yadağı iñ yarlı däwlätlärneñ berse sanaluçı Gaitidan, ike ğasırdan artıq waqıt êlek bäysezlegen iğ’lan itüennän soñ, franśuzlar suğış belän yanap aqça suırmasa, bügen il bötenläy başqa törle xäldä bula alır ide.