Vakśinalar kiräksezgä çıqtı
Bel'giyä zur külämdä koronavirus vakśinasın çüpkä ataçaq
Bel’giyädä qullanu waqıtı tamamlanıp kilüçe 436 meñ doza koronavirus vakśinasınıñ atılacağı belderelde. İlneñ “Le Soir” gazetı yazğança, AstraZeneka preparatlarnıñ waqıtı 31nçe mayda betäçäk. Bel’giyädä Kovid-19 kizüe başlanğannan birle täwge tapqır bu qadär zur külämdä vakśina çüpkä atılaçaq.
Xäbärdä äytelgänçä, iyül’ ayında tağın Moderna firması çığarğan 790 meñ doza, Pfayzer-Biontexnıñ 90 meñ doza vakśinasınıñ qullanu waqıtı tögällänä.
Bel’giyädä moña qadär qullanılmağan vakśinalarnıñ küläme 100 meñgä 5 turı kilä ide. 11 million 400 meñ keşe yäşi torğan ildä bügengä qadär 25,3 million doza vakśina yasaldı.
Bel’giyä 2021nçe yılnıñ yaz aylarında tiz baruçı vakśinalaştıru kampaniyäse başladı, 2021nçe yılnıñ axırı häm 2022nçe yıl başında östämä dozalar aldı. Bıyılnıñ fevralennän soñ ildä vakśinalaştıru bik aqrınaydı.
Franśiyädä dä uzğan ayda 3 million 600 meñ AstraZeneka vakśinasın qullanu waqıtı betkäç çüpkä attılar. İlneñ “Le Monde” gazetınıñ aprel’däge xäbärendä dön’ya külämendä 240 million doza vakśinanıñ qullanu waqıtı tögällänüe citkerelde. Älege preparatlar yuqqa çığarılu öçen Nigeriyağa cibärelgän.
