Ukrainada rus ğaskäriyen xökem ittelär

Ukraina mäxkämäsendä xökem itelgän täwge Rusiyä ğaskäriye Vadim Şişimarin suğış cinayäte êşläwdä häm keşe üterüdä ğayeple dip tabıldı. Ul ilneñ Sumi töbägendä tınıç xalıqtan ber keşeneñ ğomeren özgän.

Başqala Kiyevtağı Solomenskiy mäxkämäse çığarğan qararda 21 yäş’lek Şişimarinnıñ cinayät’ne usal niyät belän êşläwe häm monıñ tulısınça isbatlanuı belderelä. Anda yazulğança, üterelgän keşe ğaskäri öçen bernindi yanaw tudırmağan.

Vadim Şişimarin Rusiyä armiyäse belän Ukrainanıñ Sumi töbägenä kerä häm 28nçe fevral’dä Çupaxovka şähärçegendä öye yanında basıp torğan häm yanında bernindi qoralı bulmağan 62 yäş’lek Aleksandr Şepilovnı başına utlı qoraldan atıp üterä. Soñınnan Şişimarin Ukraina armiyäsenä äsirlekkä êlägä. Anıñ êşe 18nçe mayda Solomenskiy mäxkämäsendä qarala başlıy. Bu Rusiyäneñ Ukrainağa qarşı suğış başlawınnan birle rus ğaskäriyenä qarata açılğan berençe däğ’wa bularaq iğ’tibarnı cälep itä.

Vadim Şişimarin ğomerlek törmägä xökem itelde.