Yaponiya häm Awrupa Berlege Tın okeanı töbägendä xezmättäşlek urnaştıra

Yaponiya Baş ministrı Kişida Fumio başqala Tokioğa kitkän Awrupa Berlege Şurası başlığı Şarl’ Mişel’ häm Awrupa Berlege komissiyası räise Ursula von der Leyen belän "Yaponiya-Awrupa Berlege sammitı”nda oçraştı.

Sammittan soň oyıştırılğan urtaq matbuğat oçraşuında fikerlären citkerüçe Kişida taraflarnıň "İrekle häm açıq Hind-Tın okeanı" vizionınıň tormışqa aşırıluı belän iq’tisad häm ênergetika iminlegeneň täêmin itelüe xezmättäşlegeneň urnaştırıluı mäs’äläsendä kileşüen äytte.

Baş ministr Kişida Ukrainada xalıqara tärtipneň nigezen qaqşatqan höcümnärgä qarşı Rusiyägä köçle sankśiyälärne kertüdä dä ileneň Awrupa Berlege belän xezmättäşlegen däwam itäçägen belderde.

"Awrupa belän Hind-Tın okeanı iminlege ber-bersennän ayırıla alınmıy”, - dip äytüçe Kişida ber ük töp qıymmätlärne urtaqlaşqan Yaponiya belän Awrupa Berlegeneň status-kvonıň köç qullanılıp üzgärtelüenä qarşı çığuların citkerde.

Mişel’ dä, demokratiyanı yaqlağan taraflarnıň tirän häm dinamik mönäsäbätlärgä iyä buluına iğ’tibarnı yünältep: "Yaponiya häm Awrupa Berlege Hind-Tın okeanında iň yaqın strategik urtaq”, - dip äytte.

Rusiyäneň Ukrainada 24nçe fevral’dän birle däwam itüçe höcümnäreneň tağın da tirän xezmättäşlekneň möhimlegen açıp saluın äytüçe Mişel’ taraflarnıň törle ölkälärdä xezmättäşlekne köçäytäçägen belderde.

Hind-Tın okeanın “kiyırenkelek teatrı” dip atawçı von de Leyen dä Könçığış Qıtay diňgeze belän Kön’yaq Qıtay diňgezendäge barışnı häm Tön’yaq Koreyanıň däwam itüçe yanawların telgä aldı.

Söyläşü waqıtında ayıruça Tayvan’ buğazında totrıqlılıqnı saqlap qalunıň ähämiyätenä dä basım yasawçı taraflar yarımütkärgeçlär belän bergä täêmin itü çeltäreneň nıqlığınıň arttırıluı häm törleländerelüe belän sanlı texnologiyälärneň üsterelüe mäs’äläsendä urtaq fikergä kilde.