AQŞ küzläw oyışmaları rus generalların üterergä bulışa

Amerika Quşma Ştatlarınıñ Ukraina armiyäsenä xärbi küzläw mäğ’lümatların citkerüe säbäple yaqınça 12 rus generalınıñ suğış mäydanında nişanğa alınıp üterelüe söylänä.

“N’yu-York Tayms”nıñ yuğarı däräcäle amerikalı wäqalätlelärneñ süzlärenä nigezlängän xäbärendä äytelgänçä, AQŞ Ukrainağa, Rusiyäneñ küçmä xärbi ştab-fatirınıñ urının da kertep, suğış qırındağı xäl turında operativ mäğ’lümat citkerep tora. Ukraina armiyäseneñ, moña üzeneñ küzläw oyışmalarınıñ mäğ’lümatın da quşıp, suğış qırında rus xärbi wäqalätlelären nişanğa aluı häm xäzergä qadär yaqınça 12 generalnı artilleriyä utı yäisä başqa höcümnärdä üterüe alğa sörelä.  

Xäbärdä Ukraina armiyäseneñ höcümnäreneñ barısınıñ da AQŞ küzläw mäğ’lümatlarına tayanmawı citkerelä. Anda, şulay uq, Amerikanıñ Rusiyä armiyäse turında mäğ’lümatnı niçek cıyuı yäisä alarnı citkerüläre arqasında niçä rus generalınıñ üterelüeneñ tögäl bilgele bulmawı da äytelä.

Bu tırışlıqlarnıñ Bayden idaräseneñ Ukrainanıñ köräşenä yärdäm itü öçen yäşeren yärdämeneñ ber öleşe buluı farazlana. Avtorlar Aq Yortnıñ küzläw mäğ’lümatları belän urtaqlaşuınıñ Rusiyä däwlät başlığı Vladimir Putinnı qotırta aluın assızıqlıy.