"Guterriş Rusiyäneñ "tozağı"na töşärgä mömkin"

Ukraina tışqı êşlär ministrı Dmitro Kuleba BMOnı Mariupol’ portınıñ êvakuaśiyäse öçen Rusiyägä basım yasarğa çaqırdı. Ul “Associated Press”qa interv’yusında BMO ğomum särqatibe Antonio Guterrişnıñ Kiyevqa säfärennän alda Mäskäwgä kitüe öçen borçıluın äytä. Kuleba anıñ başqa bik küp wäqalätle şikelle ük Rusiyäneñ “tozağı”na töşä aluınnan qurqa.

“Guterriş, başlıça, barı ber mäs’älägä iğ’tibar itärgä tiyeş - Mariupol’neñ êvakuaśiyäse,”-di ul.

Kuleba AQŞ däwlät särqatibe Êntoni Blinken häm saqlanu ministrı Lloyd Ostinnıñ kritik çorda Ukrainağa säfär yasawların maqtıy. Ul alarnı Ukraina öçen, dön’yadağı başqa illärgä qarağanda, kübräk tırışuçı däwlätneñ wäqalätleläre bularaq bäyäli.

Kuleba suğışta ciñü häm Rusiyä däwlät başlığı Vladimir Putinnıñ Awrupağa taba kerüenä kirtä quyu öçen Könbatışnıñ Ukrainağa kiräkle qorallarnı tiz arada cibärüe möhimlegenä iğ’tibarnı cälep itä.

“Beläsez, qorallar turındağı här söyläşü bezneñ “moña ixtiyacıbız bar” diyüebez belän başlana. Cawap - “Näq’ menä moña ixtiyacığız bar mikan? Monı uylarğa kiräk” bula. Uylaw küp waqıtnı ala, ä suğış şul arada däwam itä bit,”-dip söyli Ukraina tışqı êşlär ministrı.

Kuleba Rusiyäle wazıyfadaşı Sergey Lavrovnıñ citdi söyläşügä äzer buluın uylamawın, şul räweşle, Rusiyäneñ dä dialog yulı belän çişeleş tabarğa äzer tügellegen citkerde.

“Bu mönäsäbätne üzgärtülären häm ike yaq ta qabul itäçäk çişeleşlär êzlärgä äzer buluların kürsäm, ciränü xisemne ber yaqqa quyıp anıñ belän söyläşäçäkmen,”-di Ukraina ministrı.

Kuleba äytüençä, Putin Zelenskiy belän oçraşunı niqadär irtä qabul itsä, suğışnıñ betü mömkinlege şulqadär yuğarı.