"Ӓgӓr Mariupol’dӓ bezneň xalıq yuq itelsӓ, Ukraina Rusiya belӓn ütkӓrelӓçӓk söylӓşülӓrdӓn çigenӓçӓk”

Ukraina dӓwlӓt başlığı Volodimir Zelenskiy Rusiya - Ukraina suğışınıň 59 nçı könendӓ başqala Kiyev üzӓgendӓge Xreşatik metro stanśiyӓsendӓ matbuğat oçraşuı ütkӓrde.

Ul Mariupol’neň üzlӓre öçen zur ӓhӓmiyӓtkӓ iyӓ buluın assızıqladı.

”Ӓgӓr Mariupol’dӓ bezneň xalıq yuq itelsӓ, basıp alınğa töbӓklӓrdӓ güyӓ referendum ütkӓrelsӓ, Ukraina Rusiya belӓn ütkӓrelӓçӓk telӓsӓ nindi söylӓşülӓrdӓn çigenӓçӓk” dide Zelenskiy.

”Qulıbızda citӓrlek dӓrӓcӓdӓ qoral bulğaç waqıtlıça basıp alınğan cirlӓrne kire qaytaraçaqbız” dide ul.

Zelenskiy Rusiya dӓwlӓt başlığı Putin belӓn oçraşu xaqında tübӓndӓgelӓrne citkerde: “Minem Rusiya ilbaşı belӓn oçraşasım kilmi, ӓgӓr bez barlıq mӓs’ӓlӓlӓrne diplomatiya aşa çişӓrgӓ uylasaq, monı êşlӓrgӓ kirӓk. Putinnıň xalıqara mӓxkӓmӓdӓ xökem itelüenӓ kilgӓndӓ, keşelӓrne, balalarnı üterü turında boyırıq birgӓn hӓrkem bu sudqa kitereler dip ışanam”.

Zelenskiy suğış betkӓn oçraqta Rusiya belӓn Ukraina arasındağı söylӓşülӓrdӓ aradaşçılıq mӓs’ӓlӓsenӓ tuqtalıp, ”Aradaşçı  bulırğa telӓgӓn dӓwlӓtlӓr arasında Törkiyӓ lider bulırğa telӓgӓnen kürsӓtӓ. Törkiyӓ açıq rӓweştӓ garant illӓr arasında urın alırğa telӓwen hӓm ӓzer buluın belderӓ” dide.

Ukraina dӓwlӓt başlığı Ukrainanıň NATOğa kerü barışı xaqında bolay dide: “Ukrainanı NATOğa kertmӓw zur xata ide. Bezneň NATOğa kertelüebez ittifaqnı nığıtır, Rusiyӓneň suğış başlatmaw garantiyӓse bulır ide. Bu strategik xata ide”.