Tärawix namazınnan çığuçılarğa attılar

Kanadanıñ Toronto şähärendä tärawix namazınnan çığıp kilüçelärgä ut açtılar. Alarğa ber maşinadan atalar.

Toronto poliśiyäse süzçese Dêvid Ridzik waqıyğanıñ Skarboro töbägendäge Äbubäker-i Sıddık mäçetendä buluın belderde. Ul tärawixtan çığuçı 5 keşeneñ yuldan uzuçı texnikada utıruçılarnıñ  qorallı höcümenä duçar buluın äytte. Alarnıñ ğomerlärenä qurqınıç yanamıy. Öçese xastaxanädän çığarılğan, ikeseneñ däwalanuı äle däwam itä.

 Yaralanuçılarnıñ doşmanlıqqa säbäp bulırday nindider waqıyğada qatnaşuı belän bäyle mäğ’lümat yuq.  

Äbubäker-i Sıddık mäçete kerüçe Skarboro möselmannar cämğıyäte idaräse wäkile Nadim Şäyex bolay di: “Çınnan da, bik ärnim häm borçılam. Bügen irtän 5 qardäşebezgä attılar. Höcümçelärneñ tiz arada tabılıp xökem qarşına çığuların telibez”.