Rusiyä atom-töş yäisä ximik qorallarğa yünälergä mömkin

Ukraina däwlät başlığı Volodimir Zelenskiy Putinnıñ berkemne dä ayamıyaçağı turında kisätte

1813318
Rusiyä atom-töş yäisä ximik qorallarğa yünälergä mömkin

Ukraina däwlät başlığı Volodimir Zelenskiy suğışta 2500dän alıp 3 meñgä qadär ukrainalı xärbineñ ülüen, yaqınça 10 meñeneñ yaralanuın belderde. Ul CNN telekanalına interv’yusında dön’yadağı barlıq illärne Rusiyä däwlät başlığı Vladimir Putinnıñ taktik atom-töş qoralı qullanu ixtimalına äzer bulu mäs’äläsendä kisätte.

Zelenskiy fikerençä, Rusiyä atom-töş yäisä ximik qorallarğa yünälergä mömkin. Ul Putinnıñ keşe ğomeren bernigä sanamawın assızıqlıy.

Zelenskiy Ukraina bärgän Rusiyä korabı turında bolay dide: “Korabnıñ yuq buluın beläbez, bezneñ öçen köçle qoral ide häm böten dön’yanıñ şunı belüen telim: batuı bezneñ öçen faciğa tügel. Rusiyäneñ bezgä höcüm itü öçen niqadär azraq qoralı bulsa, şulqadär yaxşı”.

Volodimir Zelenskiy äytüençä, Rusiyäneñ suğışta 19-20 meñ xärbiye ülde. Rusiyä üze isä bu sannı 1351 bularaq belderde.

Ukraina ilbaşı cirle matbuğatqa da onlayn belderülär yasadı. Anda ul Rusiyä belän alıp barılğan, tik Buça häm Borodyankadan soñ tuqtalğan söyläşülär xaqında citkerde.

Zelenskiy Rusiyä belän tözeläçäk tınıçlıq kileşüeneñ ike ayırım dokumenttan toruı kiräklegen äytä.

“Bolarnıñ berse Ukrainanıñ iminlek garantiyäse belän bäyle, ikençese turıdan-turı Rusiyä federaśiyäse belän mönäsäbät turında bulırğa tiyeş. Mäskäw barlıq problemalarnıñ çişeleşen üz êçenä aluçı berdänber kileşügä iyä bulıra teli, tik härkem üzen Rusiyä belän östäl artında tulısınça kürmi. Alar öçen iminlek garantiyäläre ayırım mäs’älä, Ukrainanıñ Rusiyä belän kileşüläre isä ayırım,”-di Ukraina ilbaşı.  

Zelenskiy xäzerge waqıtta Angliyä, Amerika Quşma Ştatları, İtaliyä häm Törkiyäneñ Ukraina iminlege garantyerı bulırğa äzer ikänleklären äytte.  

Süz uñayınnan Ukraina liderı Angliyä xökümäte räise Boris Djonson belän telefonnan söyläşte. Anda Zelenskiy Mariupol’däge wäzğıyät’ turında mäğ’lümat birde. Djonson isä Angliyäneñ kiläse könnärdä Ukrainağa köbäle texnikanı da kertep tağın saqlanu qoralları cibäräçägen belderde.



Bäyläneşle xäbärlär