Peruda uramğa çığu tıyıldı

Peruda soñğı könnärdä artqan inflyaśiyägä qarşı rizasızlıq çaraların buldırmas öçen başqala Limada uramğa çığu tıyıldı.  

Däwlät başlığı Pedro Kastil’o xalıqqa möräcäğatendä Lima häm anıñ yänäşäsendäğe port şähäre Kal’yaoda ğadättän tış xäl iğ’lan itte häm komendant säğate kertelüen dä belderde.

Peruda soñğı 24 yıldağı iñ yuğarı inflyaśiyä kürelä. Däwlät başlığı Kastil’o xalıqqa yärdäm itü öçen yağulıq salımnarın töşerde häm minimal’ xezmät xaqın 10%qa arttırdı. Tik kübese bilgelängän xezmät xaqı bulmağan terkälüsez urınnarda êşläwçe keşelär monıñ faydasın sizmi.  

Kiçä avtobus yörtüçelär êş taşlap yullarnı yapqan ide. Xökümät şunnan soñ armiyägä möräcäğat’ itte.

Perunıñ statistika byurosınnan uzğan atnada yasalğan belderüdä qullanuçı bäyäläreneñ martta, uzğan yılğı belän çağıştırğanda, 6,82%qa artuı citkerelä. Bu 1998nçe yılnıñ avgustınnan birle iñ zur kütärelü.