Ukrainada qabat yözlägän cäsäd tabıldı

Ukrainada Rusiyä armiyäseneñ höcümnärendä 24nçe fevral’dän birle  161 balanıñ ğomere özelde, 264e yaralandı.

Ukraina general’ prokuraturası bombalawlarda 869 belem yortınıñ zarar kürüen, bolardan 83eneñ tulısınça cimerelüen citkerde.

Ukraina baş prokurorı İrina Venediktova Rusiyä armiyäsennän qotqarılğan Kiyev töbägendä tınıç xalıqtan 410 keşeneñ üle gäwdäse tabıluın belderde. Ul sośial’ media akkauntınnan yasağan açıqlawında cirlekneñ här qarışında êzläw-qotqaru êşçänlegeneñ däwam itüen, anda kriminal’ êkspertiza xezmätkärläre, şartlawçı matdä belgeçläre, kinologlar häm tabiblarnıñ da qatnaşuın äytte.  

“Kiyev töbägeneñ qotqarılğan urınnarında Rusiyäneñ ayawsız suğış cinayät’läreneñ bik ähämiyätle dälilläre bar. Bu - bezneñ tufraqlarıbızda monı oyıştıruçılarğa cäza birü öçen terkälergä tiyeşle cähännäm,”-dip yazdı İrina Venediktova.

Ul waqıyğanıñ şahitläre häm qorbannarın bilgelärgä tırışuların, monnan tış älege faciğaneñ foto häm video dälillären cıyu öçen tikşerenülärneñ däwam itüen assızıqladı.

Ukrainanıñ Xar’kov xärbi idaräse räise Oleg Sinegubov isä Rusiyä armiyäseneñ Xarkov’ tiräsendäge Balakliya xastaxanäsennän awırular häm tabiblarnı êvakuaśiyäläw öçen planlaştırılğan konvoyğa ut açuın, anda avtobus yörtüçeneñ ülüen xäbär itte. Annan aldağı könne ruslarnıñ Balakliya rayon xastaxanäsen utqa totuı näticäsendä bina zarar kürgän ide. Yaqınça 70 keşeneñ êvakuaśiyälänüe kiräklege belderelde.