Äfğanstanda xatın-qızlarğa oçqıçqa yalğız menü tıyıldı

Äfğanstanda Taliban idaräse xatın-qızlarnıñ oçqıç belän yalğız  säyäxät itüen tıydı.

Waqıtlı xökümät hawa yulı şirkätlärenä çaqıru yasap, ğailälärdän ozatıp baruçı ir-at bulmağanda, xatın-qız yulçılarğa bilet satmasqa quştı.

Ariana äfğan hawa yulı häm Kam hawa yulı şirkätläreneñ idaräçeläre Franśiyäneñ xäbär agentlığına belderüdä, Talibannan kilgän kürsätmä nigezendä, berüze yulçılıq itüçe xatın-qızlarğa êçke häm xalıqara reyslarğa bilet satılmawı soraluın citkerde.

Taliban waqıtlı xökümäteneñ mäğarif ministrlığı uzğan atnada il külämendä qız uquçılar öçen xäzergä başlanğıç sıynıflarnıñ açıluın, urta häm yuğarı sıynıflarnıñ ikençe kürsätmägä qadär kötäçägen xäbär itte. Belderüdä qız balalarnıñ mäktäp formasınıñ şäriğat’, äfğan tradiśiyäläre häm mädäniyätenä yaraqlı itep çığarılaçağı, şunnan soñ barlıq sıynıflarnıñ açılaçağı äytelä.  

Taliban xökümäte, monnan tış, xatın-qızlar häm ir-atlarnıñ cämäğat’çelek öçen açıq park häm baqçalarğa ber ük waqıtta kerüen tıydı. Qarar nigezendä, parklar çärşämbe, pänceşämbe, comğa häm şimbä könne ir-atlarğa, başqa könnärne xatın-qızlar öçen açıq bulaçaq.