Rusiyädä şikär häm qaraboday qıtlığı

24nçe fevral’dä Ukrainağa başlatqan höcüm näticäsendä Rusiyägä qarata ğamälgä kertelgän kiñ qolaçlı sankśiyälär arqasında Rusiyäneñ aqça berämlege rubl’neñ qıymmäten yuğaltuı häm êşlänmälärne cibärüdäge awırlıqlar ildä tovarlarnıñ bäyälärendä dä çağılış taba.

Suğış başlanğannan soñ 26nçı fevral’-4nçe martnı üz êçenä alğan çorda atnalıq inflyaśiya 2,2%qa kütärelep 2008nçe yıldan birle iñ yuğarı artu bularaq terkälde.

5nçe-11nçe mart atnasında da êşlänmä bäyäläre möhim külämdä arttı. Atnalıq inflyaśiya 2,1% külämendä bulsa, ber yıllıq inflyaśiya 2,1 bilgegä artıp, 2015nçe yılnıñ dekabr’ ayınnan birle berençe tapqır 12,5%qa citte.

Rusiyäneñ çista êksportyor bulğan şikärneñ bäyäse 1nçe marttan soñ yaqınça 15%qa arttı.

Qayber kibetlärdä watandaşlarnıñ kübäygän soraw-taläbe arqasında ber keşe ala alaçaq şikär, toz häm qaraboday miqdarına çikläwlär quyıldı. Şaqtıy kibettä isä şuşı produktlarnıñ kiştäläre buşap qaldı.

Rusiyä matbuğatında çıqqan qayber xäbärlärdä dä Sankt- Peterburgta mäktäplärdäge imtixannarnıñ käğaz’ tabıla alınmawı arqasında kiçekterelüe belderelde.

İlbaşı Vladimir Putin 16nçı marttağı belderüendä, il iq’tisadındağı awırlıqlarnı kürülären äytep, däwlät xezmätkärläreneñ êş xaqın häm pensiya aqçasın kütäräçäklären iğ’lan itte.

İldä şikär satuğa däwlät monopoliyasınıñ kiterelüe kön tärtibendä bulsa, Baş ministrnıñ berençe urınbasarı Andrey Belousov Awıl xucalığı ministrlığına şikär bäyälären totrıqlı itü boyırığın birde. Rusiyä xökümäte 14nçe martta qabul itkän qarar belän şikär êksportınıñ tuqtatıluın beldergän ide.