AQŞ Ukrainağa 13,6 milliard dollarlıq yärdäm paketın rasladı
Anda Ukrainağa xärbi yärdäm häm çit illärgä qaçarğa mäcbür bulğan ukrainalı möhacirlärgä bulışlıq maddäläre dä urın ala
AQŞ ilbaşı Djo Bayden Rusiyä belän suğışta bulan Ukrainağa 13,6 milliard dollarlıq yärdämne küzallawçı byudjet ölgesen rasladı.
Monnan alda dokument AQŞ senatı häm Wäkillär palatası aşa uzdı.
Bayden älege fond belän Ukrainadan tış suğıştan zarar kürgän kürşe däwlätlärgä dä yärdäm yasalaçağın assızıqladı. Ul soñğı 1 yılda Ukrainağa 1,2 milliard dollarlıq saqlanu yärdäme täêmin itelüen belderde.
“Bu suğış 3 millionğa yaqın ukrainalını möhacir xälenä kiterde häm alarnıñ sanı kön sayın arta. 12 million keşe xäzerge waqıtta gumanitar yärdämgä moxtac. Bez gumanitar yärdäm mäs’äläsendä böten dön’yanı mobilizaśiyälibez,”-dide Bayden.
Ul imzalağan yaña dokument belän Ukrainağa, saqlanu häm gumanitar yärdämne dä kertep, milliardlağan dollar yärdäm cibäreläçägen assızıqladı.
“Bu yärdämnär belän Rusiyä däwlät başlığı Vladimir Putin suğışınıñ Ukraina häm region xalqına yasağan yaralarnı bäylärgä tırışabız,”-di AQŞ liderı.
13,6 millird dollarlıq yärdäm paketı qısalarında Ukrainağa xärbi yärdäm häm çit illärgä qaçarğa mäcbür bulğan ukrainalı möhacirlärgä bulışlıq maddäläre dä urın ala.
