"Ximik qorallar Ukrainada tügel, Rusiyä qulında"

AQŞnıñ Üzäk küzläw oyışması ŚRU citäkçese Uil’yam Berns Rusiyäneñ monnan alda da başqa urınnarda ximik qoral qullanuın, Ukrainada da qullanu ixtimalı barlığın alğa sörde. Ul Senatta oyıştırılğan “Dön’ya külämendäge yanawlar” dip ataluçı utırışta çığış yasadı.

Berns, başlıça, Rusiyä belän Ukraina suğışı turında söyläde. Anıñ fikerençä, Rusiyä däwlät başlığı Vladimir Putin Ukraina mäs’äläsendä awır xäldä, çönki suğış ul telägän şikelle barmıy.

Berns suğışnıñ ber aspektınıñ - mäğ’lümati suğış buluın belderep, Putinnıñ anda ciñelüen äytte.

ŚRU citäkçese Rusiyäneñ Ukrainada ximik qoral qullanu ixtimalı turındağı sorawğa bolay dip cawap birde: “Bu Rusiyä qullana torğan taktikalarnıñ berse. Ximik qorallarnı üz watandaşlarına qarşı da qullandılar, Süriyädä qullanuğa iñ kimendä êtärdelär. Bu wäzğıyät’kä bik citdi qarıybız”.

Uil’yams Berns, monnan tış, ximik qorallarnıñ Ukraina qulında tügel, Rusiyänekendä buluın assızıqladı.