Makron kölkegä qaldı

Franśiyä ilbaşı Êmmanuêl’ Makron aprel’ ayında uzaçaq däwlät başlığın saylawda qabat kandidaturasın kürsätte. Tik anıñ saylaw kampaniyäse qısalarındağı berençe mitingı bik uñışlı kilep çıqmadı – sorawlarnıñ aldan äzerlänep qatnaşuçılarğa taratıluı bilgele buldı.

“France Inter” radiosınıñ xäbärenä qarağanda, Makron saylaw aldınnan köndäşläre belän bäxäsläşü urınına franśuz xalqı belän söyläşüne östen kürä. Ul saylaw kampaniyäsen Parijnıñ Puassi bistäsendä yaqınça 250 keşe qatnaşuçı çara belän başlap cibärä. Cirlektä mêr - Franśiyä ilbaşınıñ tarafdarı Karl Oliv. Mitingta anıñ Makronğa yasalma iltifatları häm süzlären bik yış alqışlar belän bülüe jurnalistlarnıñ iğ’tibarın cälep itä.

Çara soraw-cawap räweşendä oyıştırılğan bula. Tik Makronğa saylawçılar tarafınnan birelgän sorawlarnıñ aldan centekläp äzerlänüe, här sorawnı kemneñ sorayaçağı bilgeläp yazılğan käğaz’lär taratıluı açıqlana.   

İlbaşınıñ iñ yaqın köndäşe Milli berdämlek partiyäseneñ liderı Marin Le Pen köndäşläre belän bäxäsläşüne kire qaqqan häm xalıq belän dialoglarda xärämläşkän Makronnı tänqıyt’läde. “Demokratiyäbez çın bäxäsläşülärgä layıq. Makron teatrları citärlek buldı,”-dide ul.