Tağın ber rus milliarderı suğışqa qarşı

Tanılğan rus êşmäkäre häm Rusiyäneñ iñ zur banklarınnan berse Tinkoffnıñ xucası Oleg Tin’kov Ukrainadağı xälneñ qabul itelmäs buluın häm üzeneñ suğışqa qarşı ikänlegen belderde. Ul İnstagram akkauntında üze tözegän fond yärdämendä leykemiyä belän awıruçı keşelärneñ tormışların qotqarırğa tırışuların añlattı. Êşmäkär üzeneñ dä yaman şeş belän köräşüenä iğ’tibarnı cälep itä.

“Tormışnıñ niqadär tiz ualuçan buluın min şäxsän kürdem. Xäzer Ukrainada här könne ğayepsez keşelär ülä, bu qabul itelmäslek xäl,”-di Tin’kov.

Ul däwlätlärneñ üz aqçaların suğışqa tügel, keşelärne tereltü öçen qullanırğa tiyeşlegen assızıqlıy. “Bez bu suğışqa qarşı,”-di milliarder.

Monnan alda Rusiyä milliarderları Mixail Fridman häm Oleg Drripaska da illäreneñ Ukrainağa höcümenä qarşı çığıp tınıçlıqqa çaqırdı.