Ülem cäzasınnan qotıldı - yöräk öyänägennän ülde

İranda keşe üterüdä ğayeplängän häm ülem cäzasına xökem itelgän beräw qorbannıñ ğailäse anı kiçergännän soñ yöräk öyänägennän ülde.

“Hamshahrionline” xäbär säxifäsendä yazılğança, mäxküm 18 yıl êlek Bender Abbas qalasında ber keşeneñ ğomeren özä. Qorbannıñ ğailäse anı ğafu itkännän soñ ülem cäzasınnan da qotıla. Tik Äkbär isemle älege 55 yäş’lek mäxkümneñ yöräge bu söyeneçkä çıdamıy. Anı xastaxanägä alıp kitälär, läkin tabiblar qotqarıp qala almağan.

Mäxkümneñ 2004nçe yıldan birle Bender Abbas törmäsendä utıruı häm küpmeder waqıttan birle yöräge awırtuı belderelde.

İran cinayät’ qanunnarı nigezendä, üterüdä ğayeplänep xökem itelüçelär, qorbannıñ tuğannarı kiçergän oçraqta, ülem cäzasınnan qotıla. Ul qan aqçası dip ataluçı kompensaśiyä tüli häm törmä srogı bulsa, anı tutırıp beterä.