Bayden belän Zelenskiy añlaşa almağanmı?

İke lidernıñ telefon aşa äñgämäseneñ yaxşı barıp çıqmawın äytüçelär bar

1769661
Bayden belän Zelenskiy añlaşa almağanmı?

Amerika Quşma Ştatları ilbaşı Djo Bayden Ukraina däwlät başlığı Vladimir Zelenskiy belän telefon aşa söyläşte.

Aq Yorttan yasalğan yazmaça belderügä qarağanda, anda Bayden Rusiyä Ukrainağa bärep kergän oçraqta AQŞnıñ xezmättäşläre häm berlektäşläre belän xälitkeç adım yasarğa äzer buluların tağın ber qat äytä.

Ul, şulay uq, Ukrainanıñ iq’tisadına teräk bulırday makroiq’tisadi yärdäm yulların êzläwlären dä citkerä. AQŞ uzğan yıl älege ilgä yartı milliard dollar külämendä üseş häm gumanitar yärdäm niyätennän finanslar cibärgän.

Bayden söyläşüdä, ilçelek xezmätkärläreneñ Ukrainadan kitüenä qaramastan, AQŞnıñ Kiyevtağı diplomatik missiyäseneñ açıq häm tulısınça ğamäldä buluın assızıqladı.

Ukraina däwlät başlığı Zelenskiy da Bayden belän söyläşüe turında Twitter akkauntında belderü yasadı.

“Ängämä ozaq bardı. Kiyerenkelekne kimetü öçen diplomatik iniśiativalarnı qaradıq. Aldağı urtaq adımnar mäs’äläsendä kileştek. Baydenğa daimi xärbi yärdäm öçen räxmät belderdem. Östäwenä, Ukrainağa matdi yärdäm cibärü mömkinlege dä qaraldı” dip yazdı ul.

Aq Yort milli iminlek şurası süzçese Êmili Xorn beldergänçä, Bayden Zelenskiy belän äñgämäsendä “Rusiyäneñ Ukrainağa kiläse ayda bärep keräçägenä bäyle açıq ixtimal bar” digän.

“İlbaşı monı ap-açıq äytte, bez dä aylar buyı bu turıda kisätäbez,”-dide ul.

Şul uq waqıtta, Ukraina tarafında ike lidernıñ äñgämäseneñ bik yaxşı barıp çıqmawın äytüçelär bar.

CNNnıñ xäbärenä qarağanda, Ukrainanıñ yuğarı däräcäle ber wäqalätlese yaqlarnıñ Rusiyä höcümeneñ xäwefe mäs’äläsendä anlaşa almawların citkergän.



Bäyläneşle xäbärlär