"Ukrainada bar da kontrol' astında"

Ukraina däwlät başlığı Vladimir Zelenskiy panikağa birelergä säbäp bulmawın belderde

1767811
"Ukrainada bar da kontrol' astında"

Ukraina däwlät başlığı Vladimir Zelenskiy ilneñ könçığışındağı kiyerenkelekne kimetü êşçänlegen däwam itülären belderde. “Wäzğıyät’ kontrol’ astında, panika kiräk tügel,”-dide ul.

Zelenskiy Rusiyä belän bulğan kiyerenkelek turında söyläşü öçen İminlek şurası cıyılışında qatnaştı. Ul utırıştan soñ sośial’ mediada videoyullama urtaqlaşıp här närsägä äzer buluların söyläde. İlbaşı wäqalätlelärneñ kiräkle barlıq êşçänleklärne başqaruların citkerde.

“Wäqalätlelär kiyerenkelekne tulısınça kimetü öçen tırışa. Bez xezmättäşlärebez, diplomatlarıbız häm iñ ähämiyätlese armiyäbez belän bergä. Alar bezneñ iñ yaxşılardan, bezne saqlıylar häm bezneñ dä alarnı saqlawıbız, tınıç buluıbız häm “barısı da bette” dip qıçqırmawıbız kiräk,”-dip söyläde Zelenskiy.

Şul uq waqıtta, Milli saqlanu häm iminlek şurası räise Danilov ta cıyılıştan soñ Ukrainanıñ könçığışında wäzğıyät’neñ kontrol’ astında buluın qabatladı. Ul xalıqnı häm matbuğatnı tınıç bulırğa çaqırdı.  

“Xäzerge wäzğıyät’ bezneñ öçen bik açıq, panikağa birelü öçen säbäp yuq. Bar keşedän tınıç buluların sorıym. Wäzğıyät’, hiçşiksez, kontrol’ astında,”-dide Danilov. Ul Ukraina çigendä Rusiyä armiyäseneñ 109 meñ xärbiye buluın äytte. “Bu bezneñ öçen yañalıq tügel. 2-3 meñlek artu kritik wäzğıyät’ kiterep çığarmıy,”-dide räsmi zat. Ul Rusiyäneñ Ukrainanı basıp alu yanawınıñ 2008nçe yıldan birle buluına iğ’tibarnı cälep itte.

“Wäzğıyät’ uzğan yıllardağıdan ayırmalı tügel. Bügen Sovetlar Berlegeneñ närsä ikänen, Leninnıñ kem buluın belmäwçe yaña näsel watandaşlarıbız bar. Başqa dön’yada yäşibez häm bu Rusiyäne bik borçıy. Bu problemanı çişü öçen bik az waqıtlartı qaldı. Östäwenä, Putinnıñ da biologik säğateneñ, Rusiyä federaśiyäseneñ dä biologik säğateneñ êşläwen beläbez,”-dip söyläde Danilov.



Bäyläneşle xäbärlär