Çik buyında 4 keşe tuñıp ülde

Kanadadan AQŞqa kerergä mataşuçı qaçaqlarnıñ yazmışı faciğa belän tögällänä

1766625
Çik buyında 4 keşe tuñıp ülde

Kanadadan Amerika Quşma Ştatlarına qanunsız yullar belän kerergä mataşuçı 4 qaçaq çik buyında tuñıp ülde. Alarnıñ 2se bala.

AQŞ tamğaxanä häm çik buyı saqçıları xezmäte Kanada belän Tön’yaq Dakota ştatı arasındağı çiktä maşina kontrole uzdırğanda 15 keşe utırğan avtobusta dokumentsız 2 hind yulçı barlığın açıqlıy. Alardan soraw alğannan soñ ber ük törkemnän buluı farazlanuçı häm çikne cäyäw uzğan tağın 5 keşe şul tirädä êläkterelä.  

Kanada iminlek wäqalätleläre belän bergä çikneñ ike yağınnan da êzläwne arttıralar. AQŞ çigenä 10 metr yıraqlıqta Kanadanıñ Manitoba töbäge qırlarında 4 keşeneñ tuñğan üle gäwdäse tabıla. Hälaq buluçılar ber ir-at häm xatın-qız, yannarında yäşüsmer ir bala häm bäbäy bar.

Şul uq törkemnän bulğan häm êläkterelgän 2 keşeneñ ayaq häm qullarında citdi öşetü bilgeläre bula. Alarnı xastaxanägä iltälär. Bu keşelärgä öleşçä amputaśiyä yasalırğa mömkin.

Wäqalätlelär töbäktä hawa temperaturasınıñ -25 gradus tiräsendä buluına iğ’tibarnı cälep itte. Qaçaqlar çikne uzu öçen yaqınça 11 säğat’ buyınça tışta qalğan.

Minnesota ştatı Kitson töbäge şerifı urınbasarı Patrik Klegstad beldergänçä, çik buyındağı qaçaqlar ağımı, ğadättä, AQŞtan Kanadağa taba bula. Ul bu törkemneñ xäle häm nigä qışqı şartlarda xäräkät itülären tikşeräçäklären belderde.



Bäyläneşle xäbärlär