5G texnologiyäse oçqıçlarğa qomaçawlıy
Hawa yulı şirkätläre bulaçaq hälakätlär turında kisätä
Amerika Quşma Ştatlarında hawa yulı şirkätläre aêroport yänäşälärendäge 5G xezmätläreneñ oçqıçlarnıñ möhim öleşlärenä täêsir itäçägenä borçıla. Alar bu xaqta aviaśiyä wäqalätlelären kisätte. Hälakät ixtimalı turında belderüçe xatqa Amerikan Êyrlayns, Del’ta Êyr Layns, Yunayted Êyrlayns, Souçvest Êyrlayns hawa yulı şirkätläre, yök taşuçı UPS häm FedEX firmaları qul quyğan.
Anda yaña tör 5G texnologiyäseneñ oçqıçlarnıñ cirgä qadär yıraqlıqnı ülçi torğan cihaz şikelle möhim öleşlärenä yoğıntı yasıy aluı, monıñ ber köndä 1100dän artıq oçışnı ğamäldän çığaruğa kiteräçäge äytelä. Bu isä, üz çiratında, 100 meñ yulçığa täêsir itä. Şirkät idaräçeläre älege xälneñ il iq’tisadında torğınlıq kiterep çığaraçağın belderä.
Kisätü xatı Aq Yort milli iq’tisad şurası mödire Brayan Dis, transport ministrı Pit Buttidjiç, federal’ aviaśiya idaräse citäkçese Stiv Dikson häm federal’ êlemtä komissiyäse räise Djessika Rozenvorselğa cibärelde.
