Omikron gäwdäneñ öske öleşenä bärä

Bötendön’ya sälamätlek saqlaw oyışması koronavirusnıñ yaña variantı Omikronnıñ gäwdäneñ öske öleşenä kübräk täêsir itüen açıqladı.

Belgeç Abdi Maxmud oyışmanıñ soñğı tikşerenüläre xaqında matbuğatqa citkerde. Ul Omikronnıñ başqa variantlar şikelle awır infekśiyälärgä säbäpçe bulmawın belderde. Abdi Maxmud äytkänçä, bu yaxşı xäbär bulırğa mömkin, tik döreslegenä tulısınça ışanu öçen tağın da kübräk xisaplarğa ixtiyac bar.  

Belgeç Kovid-19nıñ yaña märkäzeneñ qayda buluı turındağı sorawğa bolay dip cawap birde: “Del’ta variantı waqıtında Könçığış Awrupa ozaq waqıt êpidemiyä üzäge ide. Yaña variantnıñ qayda yoğıntılı bulaçağın farazlawı awır”.

Omikron öçen ayırım vakśina yasawğa kilgändä isä,  Abdi Maxmud variantnıñ monnan soñ närsägä äwereläçägen aldan farazlaw awır buluın belderde. “Tulayım alğanda, bu xaqta qarar çığarırğa irtä,”-dide ul. Belgeç assızıqlağança, ägär Omikronğa qarşı vakśina yasalası bulsa, bu xalıqara xezmättäşlek näticäsendä çığarılırğa tiyeşle qarar häm anı xäl itü vakśina citeşterüçelärneñ üzlärenä genä birelmäyäçäk.