Süriyä temalı 17nçe Astana söyläşüläre başlandı
Süriyä krizisına çişeleş maqsatlı oyıştırılğan Astana söyläşüläreneñ garant illäre Törkiyä, Rusiyä häm İran wäkillekläre Qazaqstan başqalası Nur Soltanda 17nçe tapqır cıyıldı
Söyläşülärdä Törkiyä isemennän Tışqı êşlär ministrlığınıñ Süriyä Ğomum mödire, tulı wäqalätle ilçe Sälçuk Ünal räislegendäge wäkillek qatnaşa.
Rusiyäne İlbaşı Vladimir Putinnıñ Süriyä maxsus wäkile Aleksandr Lavrent’yev, İrannı tışqı êşlär ministrınıñ säyäsi êşlär kiñäşçese Ali Asgar Hacı wäkillek itüçe cıyılışlarda Süriyä rejimınıñ tışqı êşlär ministrı urınbasarı Ayman Susan häm Äxmät Tuma citäkçelegendäge xärbi oppoziśiya qatnaşa.
Berläşkän Millätlär Oyışmasınıñ Süriyä maxsus wäkile urınbasarı Khawla Mattar da qatnaşqan söyläşülärdä Ğıyraq, Yordaniya häm Livan “küzätüçe” statusı belän söyläşü östälendä üz urının aldı.
Törkiyä delegaśiyası söyläşülär qısalarında iñ êlek BMO Süriyä maxsus wäkillege belän oçraştı.
İke kön däwam itäçäk söyläşülärdä Süriyädäge könüzäk wazğiyät, humanitar yärdämnärneñ citkerelüe, Jenevadağı Süriyä töp qanun komitetı êşçänlegeneñ qabat başlatıluı, totqınnar belän almaşu, totıqlarnıñ irekkä cibärelüe häm xäbärsez yuğalğan keşelärne êzläw kebek ışanıç arttıruçı çaralar töp kön tärtiben täşkil itä.
Rusiyä İlbaşı Vladimir Putinnıñ Süriyä maxsus wäkile Lavrent’yev cıyılış aldınnan matbuğat wäkillärenä yasağan belderüendä östenlekle bularaq mäydandağı wazğıyät häm utnı tuqtatunıñ täêmin itelüe mäs’älälärenä iğ’tibar itäçäklären belderde.
Lavrent’yev, soñğı waqıtta Süriyädä “DEAŞ” häm başqa terror törkemnäreneñ qabat aktivlaşa başlawın belderep: "Bez urtaqlarıbız Törkiyä häm İran belän uzdıraçaq cıyılışlarda şuşı mäs’älägä östenlek biräçäkbez”, - dip äytte.
Qaçaqlar probleması, totıqlarnıñ azat itelüe, humanitar krizis kebek mäs’älälärneñ xäl itelüe öçen Süriyädä säyäsi barışnıñ alğa cibärüneñ möhimlegenä iğ’tibarnı yünältüçe Lavrent’yev: "Süriyä töp qanun komitetı êşçänlege dä söyläşülärneñ iñ ähämiyätle kön tärtibe mäs’älälärennän berse bulaçaq. Bu mäs’älädä Süriyä wäkillege (rejimı) belän näticäle cıyılış ütkärdek”, - dip belderde.
Suriyä temalı Astana söyläşüläre 2017nçe yılda Süriyä krizisına çişeleş tabu maqsatınnan çığıp Törkiyä, Rusiyä häm İran garantlığında başlatılğan ide.
