“Xalıqara islamofobiyä belän köräş qanunı” ölgese berençe basqıçtan ütte

Amerika Quşma Ştatlarınıñ Wäkillär palatası dön’ya külämendä islamofobiyä belän köräşü öçen oyışma tözü häm monıñ öçen maxsus wäkil bilgeläwne küzallawçı qanun ölgesen rasladı. Dokumentnı AQŞ Wäkillär palatasınıñ berençe yawlıqlı möselman xatın-qız deputatı İlhan Omar täq’dim itte. “Xalıqara islamofobiyä belän köräş qanunı” dip ataluçı proyekt öçen 219 wäkil uñay tawış birde, 212se qarşı ide. Küpçelek tawış belän ul qabul itelde.

Omar üz çığışında bolay dip söyläde: “Barı säyäsi kön tärtiplärenä turı kilüe öçen genä dä bezne ıruğ, êtnik tamırlar, cenes yäisä dini qısalar belän ayırıp quyarğa teläwçe keşelär bar. Tik bezgä - Amerika xalqına - fanatizmnıñ här törenä qarşı berdäm bulırğa kiräk dip sanıym”.

Qanun ölgesen kiläse könnärdä senatta tawışqa quyaçaqlar. Ägär qabul itelsä, anı ğamälgä kertü öçen AQŞ ilbaşı Djo Baydennıñ imzalawı kiräk bulaçaq. Ul öçençe kön yasağan belderüendä proyektnı yaqlawın äytte.