Tön'yaq Koreya liderınıñ ênese ülde

Tön’yaq Koreyağa nigez salğan lider Kim İr Sennıñ ênese Kim Yon Çju ülde. İlneñ matbuğat çaralarında çıqqan xäbärlärgä qarağanda, däwlät başlığı Kim Çen In bu yuğaltu belän bäyle tirän ärnüen belderde häm märxümneñ ğailäsenä çäçäk cibärde.

Tön’yaq Koreya üzäk xäbär agentlığında basılğan qayğınamädä bolay diyelä: “Kim Yon Çju Kommunistlar partiyäseneñ yulın häm säyäsätlären tormışqa aşıru öçen fidakar’lärçä köräşte, partiyä häm däwlät wazıyfalarında êşlägän ozaq yıllar buyı sośializm tözüne tizlätü häm Koreya stilendä däwlät tärtibe barlıqqa kiterügä öleş kertte”.

Xäbärdä Kim Yon Çjunıñ qayda häm qayçan ülüe turında äytelmi. Seul berläşü ministrlığı mäğ’lümatlarında terkälgänçä, ul 1920nçe yılda tuğan.