Ukraina - Rusiyädän, Rusiyä NATOdan şöbhälänä

Kreml' häm Aq Yort kiçäge söyläşü turında belderü yasadı

1744501
Ukraina - Rusiyädän, Rusiyä NATOdan şöbhälänä
putin-biden1.jpg

AQŞ ilbaşı Djo Bayden belän Rusiyä däwlät başlığı Vladimir Putinnıñ  videokonferenśiyä aşa uzğan söyläşüendä Ukraina çigendäge kiyerenkelek qaraldı.  Aq Yort kiçä 2 säğat’ 1 minut barğan äñgämä xaqında yazmaça belderü yasadı. Anda Baydennıñ AQŞ häm Awrupalı berlektäşläreneñ Rusiyäneñ Ukraina çigendä ğaskärlärne arttıruına tirän borçıluların äytüe citkerelä.  

“Bayden, Rusiyä Ukrainada xärbi kiyerenkelekne arttırsa, AQŞ häm berlektäşläreneñ köçle iq’tisadi häm başqa çikläwlär belän cawap biräçägen açıqtan-açıq äytte,”-diyelä belderüdä.

Söyläşüdä AQŞ ilbaşı Ukrainanıñ suverenlığı häm cir bötenlegen yaqlawın assızıqlıy. Ul kiyerenkelekne kimetergä häm diplomatiyägä kire qaytırğa çaqıra.

Kreml’dän yasalğan yazmaça belderüdä dä söyläşüneñ açıq häm êşlekle buluı citkerelä häm ike lidernıñ 16nçı iyün’dä Şveyśariyäneñ Jeneva şähärendä bulğan sammitnıñ tormışqa aşırıluı turında fiker alışuı äytelä.

Söyläşüdä Ukraina mäs’äläsenä dä tuqtaluları belderelä häm 2015nçe yılda uzğan Minsk kileşüen ğamälgä aşıruda alğa kiteşneñ bulmawı telgä alına.  

“NATO Ukraina cirlären öyränü öçen xätär omtılışlar yasıy häm çiklärebez yänäşäsendä xärbi potenśialın arttıra. Şul säbäple Rusiyä NATOnıñ könçığışqa taba kiñäyüe häm kürşe däwlätlärdä qoral sistemaların urnaştıruına kirtä quyuçı ışanıçlı häm xoquqıy garantiyälär buldıru belän mäşğul’” diyelä belderüdä.  

Söyläşüdä Rusiyä häm AQŞ arasındağı xezmättäşlekneñ äle haman qanäğat’länerlek xäldä bulmawına iğ’tibar cälep itelä. Şulay uq ike lider kiber höcümnär mäs’äläse, İran şikelle temalarğa da qağıldı.



Bäyläneşle xäbärlär