150 meñnän artıq bala VİÇle

Nigeriyada 150 meñnän artıq bala keşe immunodefiśitı virusı VİÇ yörtä. İlneñ SPİDnı kontrol’dä totu programması mödire Aliyu Gambo soñğı berniçä yılda çir belän köräştä ähämiyätle alğarışqa ireşülären belderde. Şuña qaramastan, äle sannar söyenerlek tügel. VİÇ yoqtırğan 150 meñnän artıq balanıñ barı 80 meñe genä daimi däwalaw kürä. Gambo äytüençä, Nigeriyada 1 million 800 meñ keşeneñ VİÇ yörtüe farazlana. Awırularnıñ 90%ı monı belä häm alarnıñ 96%ı däwalana.

Aliyu Gambo Nigeriya SPİDnı kontrol’dä totu programmasınıñ älege qurqınıç çirgä qarşı kampaniyälärne däwam itäçägen belderde häm xalıqnı VİÇ testları yasatırğa çaqırdı.