Qaçaq krizisı: Lukaşenko arqasında Putin toramı?

Pol’şa xökümäte räise Moraveśkiy Pol’şa-Belarus’ çigendäge sıyınuçılar krizisı säbäple ğadättän tış cıyılğan parlamentta çığış yasap Rusiyäne ğayepläde. Ul ilneñ iminlege häm çikläreneñ soñğı 30 yılda täwge tapqır mondıy awır räweştä höcümgä duçar buluın belderde.   

Moraveśkiy Rusiyäneñ imperiyä säyäsäte alıp baruın assızıqlap bolay di: “Belarus’ ilbaşı Aleksandr Lukaşenko sıyınuçı krizisı prośessında Rusiyä däwlät başlığı Vladimir Putin kürsätmälären üti”.

Êçke êşlär ministrı Mariuş Kaminski isä xäzerge waqıtta Belarus’ çigendä 2 meñnän 4 meñgä qadär sıyınuçı barlığın belderä. Ul Pol’şanıñ qaçaqlar öçen marşrut bulmayaçağına basım yasıy.

“Rusiyä migraśiyä krizisı tudırıp Könçığış häm Üzäk Awrupanı, näticädä berböten bularaq Awrupa Berlegen totrıqsızlaştırırğa teli. Lukaşenkonıñ säyäsi maqsatı isä berlekne üz köçen tanırğa häm sankśiyälärne beterergä mäcbür itü,”-dide Mariuş Kaminski.

Pol’şa xäbär agentlığı PAP sıyınuçı krizisı uñayınnan Awrupa Berlege şurası räise Çarl’z Mişel’nıñ bügen Pol’şağa kilü mömkinlegen häm xökümät räise Moraveśkiy belän oçraşaçağın xäbär itte.