Peşüçelärgä yärdäm kiräk

S’yerra-Leone xökümäte başqala Fritaunda 101 keşeneñ ğomeren özgän yağulıq tankerı şartlawınnan soñ xalıqara cämäğat’çelektän mediśina yärdäme soradı.

Milli matbuğatta urın alğan xäbärlärgä qarağanda, sälamätlek saqlaw ministrlığı wäkile, tabib Moses Batima hälakättä peşüçelär öçen aşığıç räweştä medikamentlarğa ixtiyac buluın citkerä. Xastaxanälärdä yaralarnı bäyläw öçen kiräkle äyberlär, bint häm awırtunı basuçı darular citmi.

Batima äytüençä, Bötendön’ya sälamätlek saqlaw oyışmasınnan qayber medikamentlar häm başqa oyışmalardan yärdäm kilä başlağan, tik bu citärlek tügel.

İsegezgä töşeräbez, S’yerra-Leone başqalası Fritaunda 5nçe noyabr’dä yağulıq tankerı belän başqa texnika bäreleşte. Näticädä kilep çıqqan köçle şartlawda 101 keşe hälaq buldı, 100dän artığı yaralandı.

İldä ğomere özelüçelär öçen 3 könlek matäm iğ’lan itelde.