Global’ metan ittifağına 100dän artıq il kerde

Metan qaldıqların 2030nçı yıla qadär 30%qa azaytunı maqsat itep quyğan Global’ metan ittifağına kerüçe illär sanı 100dän arttı. Älege oyışmanıñ räsmi açılışı Şotlandiyäneñ Glazgo şähärendä BMOnıñ klimat üzgärü konferenśiyäsendä buldı.

Dön’yada metan qaldıqlarınıñ 46%ı öçen cawaplı 100dän artıq däwlät AQŞ citäkçelegendä sentyabr’dä iğ’lan itelgän ittifaqqa imza quydı. Alar arasında Angliyä, Awrupa Berlege illäre, Berläşkän Ğaräp ämirlekläre, V’yetnam, İndoneziya, Ğıyraq, Yaponiya, Paqıstan, Meksika, Kanada, Argentina, Braziliyä häm Nigeriya bar.  

Şul uq waqıtta dön’yada iñ küp metan qaldıqların hawağa çığaruçı 4 däwlät – Qıtay, Rusiyä, Hindstan häm Avstraliyä ittifaqqa imza quymadı.

AQŞnıñ klimat öçen cawaplı maxsus wäkile Djon Kerri üz çığışında metan atıqların kimetüneñ global’ cılınunıñ tizlegen 2050nçe yılğa qadär 0,2 gradusqa kimetäçägen belderde.

Xalıqara ênergetika agentlığı räise Fatix Birol da ittifaqnı tarixi mizgel bularaq bäyäläde. “Ägär 10 yıl êçendä bu ittifaqnı tormışqa aşırsaq, dön’yadağı barlıq maşinalar, oçqıçlar häm köymälär hawanı pıçratmıy torğan texnologiyälär belän cihazlandırılğan bulaçaq,”-dide ul.