İzrail çüplären Fälästingä iltep tügä

Fälästin xökümäte räise Möxämmät İştiyyä İzrailneñ Fälästin cirlären qatı, êlektronik häm ximik qaldıqlar buşatu urını bularaq kürüen äytte. Ul bu mäs’äläne Böyekbritaniyäneñ Qudüs konsulı Diana Korner belän söyläşü waqıtında kütärde. Oçraşu Yordannıñ basıp alınğan Könbatış üzänlegendäge Ramallax şähärendä uzdı.

Fiker alışu barışında Korner Angliyä tarafınnan finanslanğan häm Fälästin cirlärendä klimat üzgärü belän bäyle säyäsät turındağı xisapnı tapşırdı. İştiyyä anı räxmät äytep aldı.“İzrail kilep urnaşuçı yähüdlärgä bina tözü häm mäydan kiñäytü öçen ağaçlarnı kisä, cirneñ astın-öskä kiterä,”-dide ul. İştiyyä äytüençä, Fälästin moxitenä kiterelgän iñ zur awırlıq – cirläşüçelär häm qaldıqlar. “İzrail tabiğıy çığanaqlarğa ireşüebezne kirtäli, divarlar artınnan bezgä ayaq çala. Tağın da naçarı – cirlärebezne qatı, ximik häm êlektron qaldıqlar buşatu urını bularaq qullana. Fälästin dön’yada tabiğat’ne pıçratmıy. Kiresençä, tabiğatebez basıp aluçılar arqasında pıçrana,”-dip söyläde Fälästin xökümäte räise.