İke Germaniyanıñ berläşüeneñ yıllığı qotlandı

Qotlawlar bıyıl Saksoniya-Anhalt bundeslandınıñ Halle şähärendä ütkärelde.

Georg-Friedrich-Haendel zalında oyıştırılğan qotlawlarda Kanśler Angela Merkel, İlbaşı Frank-Walter Steinmeier, ministrlar, bundesland däwlät kanślerları, xalıq ışanıçlıları häm qanun çığaru organnarınıñ başlıqları qatnaştı.

Uzğan atnadağı saylawdan soñ yaña xökümät tözelgänçegä çaqlı wazıyfasına däwam itäçäk Kanśler Merkel yasağan çığışında xalıqnı demokratiya öçen tırışluq sarıf itärgä çaqırdı häm: "Bezneñ demokratiyağa ixtıyacıbız bulğanı kebek demokratiyanıñ da bezgä ixtıyacı bar. Demokratiya bolay ğına tormıy. Anıñ öçen här kön bergä êşläwebez kiräk”, - dip äytte.

Merkel matbuğat irege kebek yuğarı qıymmätlärgä höcümnärneñ buluın, cämäğätçelektä dezinformaśiya belän açunıñ häm näfrätneñ artuın citkerep: "Biredä barı tik keşelärgä yäki törkemnärgä genä yala yağılmıy, biredä barı tik kilep çığışı, tışqı küreneşe yäisä ışanuı arqasında ğına keşelärgä höcüm itelmi, biredä demokratiyağa höcüm itelä”, - dip äytte.

Keşelärneñ ber-bersenä xäräkät räweşlärendä tağın da kübräk xörmät kürsätüe zarurlığına basım yasawçı Merkel demokratiyanı saqlarğa çaqırdı.

Merkel demokratik qazanışlarğa iğ’tibar itelüen teläp: "Törlelek häm üzgäleklär demokratiya öçen qurqınıç tügel. Näq’ kiresençä törlelek häm üzgäleklär – yäşängän irekneñ çağılışı”, - dip bäyäläde.

Halle şähärendä ike Germaniyanıñ berläşüeneñ yıllığı mönäsäbäte belän ütkärelgän qotlawlar belän ber rättäm ilneñ başqa şähärlärendä dä çaralar oyıştırıldı.