Riçard Gir mäxkämädä

Aktyer İtaliyäneñ êlekkege êçke êşlär ministrı Matteo Sal’viniğa qarşı şahitlek itä

1711751
Riçard Gir mäxkämädä

Tanılğan aktyer Riçard Gir İtaliyäneñ êlekkege êçke êşlär ministrı Matteo Sal’viniğa qarşı mäxkämädä çığış yasayaçaq. Türä 2019nçı yılda İspaniyäneñ qaçaqlarnı qotqaruçı köymäsenä portqa kerergä röxsät birmäwe öçen xökem itelä. Ul, şul räweşle, keşelärne ülem qoçağına atuda ğayeplänä.

Riçard Gir İspaniyäneñ qaçaq qotqaru köymäse İtaliya portına yaqınlaştırılmağanda korabtağı keşelärgä azıq-tölek taşuçılar arasında ide. Ul waqıyğalarnıñ êçendä qaynağan keşe bularaq mäxkämädä Sal’viniğa qarşı çığaçaq häm çiktän tış uñçı lidernı ğayepläp şahitlek itäçäk.  

Siśiliya prokuraturası Sal’vininı 2019nçı yılnıñ avgustında Open Arms ictimağıy oyışmasınıñ korabın portqa kertmiçä wazıyfasına salqın qarawda ğayepläde. Köymä Lampedusa utrawı sulıqlarında kötep torğanda qayber keşelär çarasızlıqtan diñgezgä sikerde. 174 keşene qotqardılar.

Älege waqıyğalar bulğanda Riçard Gir ğailäse belän Toskanada yalda bula. Ul köymä turında işetkännän soñ ictimağıy oyışma belän söyläşä häm andağı keşelärgä aşaw-êçü iltergä yärdäm itü öçen Siśiliyağa bara. 72 yäş’lek aktyer soñınnan Lampedusadağı ber konferenśiyädä qatnaşıp qotqarılan qaçaqlarğa yärdäm itärgä çaqıra.  

19 kön däwam itkän tartışudan soñ barlıq qaçaqlarnı Lampedusa utrawına çığarırğa röxsät birelä.



Bäyläneşle xäbärlär